Resumen
Commedia, un xoguete para Goldoni é un dos espectáculos máis exitosos da historia do teatro galego, do que, dous anos despois da súa estrea, se seguen realizando numerosísimas funcións, naceu do encontro da vontade creativa duns amantes da comedia dell arte, os cómicos de Ollomoltranvía, coa xenialidade dun dos comediógrafos máis inspirados de tódolos tempos, Carlo Goldoni. Commedia naceu como un encontro vivo, en continua resposta ós estímuos de tódolos elementos que interveñen nun proceso teatral: actores, público, dirección escénica, escrita, creación plástica, etc. Esta é a razón pola que nesta edición preséntanse dous textos: o que máis ou menos, correspondía ó espectáculo na data no que se editou e o do anel máxico, o canovaccio (argumento, guión, boceto) goldoniano a partir do que, no seu momento, se puxo en marcha toda esa máquina escénica, esa bóla de neve teatral que, en texto, accións ou emocións, segue facéndose ou compactándose día a día. En palabras dos autores de Commedia, a compañía Ollomoltranvía presentamos, pois, un texto en continuo reaxuste. Un texto que hoxe xa non o é o da estrea e que mañá xa non será exactamente, o que agora editamos. Un texto vivo, que necesaria e inevitablemente, só recolle unha parte do espectáculo, pois a commedia é ante todo xogo e acción.<