Resumen
David Crystal britainiar hizkuntzalari ezagunak ingelesaren
historiaz eta erabileraz, haur hizkuntzaz, hizkuntza arazoez,
dialektologiaz edo Shakespeareren hiztegiaz lan asko eta oso
eraginkorrak argitaratu ditu. Azken hamar urteetan, hiru
lan berezi eskaini ditu Crystalek: ingelesaren izaera globalaz,
hizkuntzen heriotzaz eta Internetek hizkuntzen erabileran duen
eraginaz. Azken hiru liburu horien laburpen eguneratua da aurkezten
ari garena. Erraz irakurri ahal izateko eta mezurik garrantzitsuenak
modu egokian zabaltzeko pentsatua.
Arlo asko dira liburu honetan interesatu zaizkigunak. Ingelesaren
gailentasunak ez gaitu harritu, nahiz eta ematen diren datuak
txundigarriak izan. Hala ere, hizkuntza txiki edo gutxituen
heriotza egoeraren ezaugarri ezkutuak jakinarazi nahiak gehiago
bultzatu gaitu euskarazko itzulpen hau bideratzen. Hizkuntza
aniztasuna desagertzeko arriskuaren handia eta zabala zeinen
oharkabe gertatzen ari den ikustea eta erakutsaraztea ezinbesteko
ekimena iruditzen zaigu.
Euskalduna bezalako gizartean ere, nahiz eta hizkuntza gutxitu
baten indarberritzeko ahalegin handiak egiten ari garen, derrigorrezkoa
iruditzen zaigu beste egoeren jakitun, eta nolabait suspertzaile
ere izatea, hizkuntzen egoeran ingurugiroarenean bezala, gauzak
geroz eta elkarlotuagoak gertatzen baitira. Ez dauka zentzurik
hizkuntza baten biziraupenaz arduratzeak antzeko egoeran daudenenaz
ohartu gabe. Eta hori da, hain zuzen, David Crystalek Hizkuntzaren
Iraultza liburuarekin azpimarratu duena.
