Resumen
As crónicas de Gáidil é un xogo de rol cunha ambientación de fantasía castrexa, onde os xogadores vivirán aventuras encarnando grandes guerreiros, poderosos druídas, escuros cazadores do Sidhe ou mesmo ocultos Fir Bolg, Fomoriáns malignos ou Mariños do Mar do Solpor. Este xogo conta cunha ambientación propia e un sistema de xogo completo co que poderás comezar a xogar desde xa. Tan só precisas de papel, lapis, goma, uns cantos dados de seis caras e unha manchea de amigos para compartir as túas aventuras. Benvido a Gáidil! Pablo Fernández Otero (Compostela, 1977) e Nacho Rodríguez Domínguez (Ferrol, 1973) coñecéronse cursando Maxisterio na Universidade de Santiago de Compostela. Foi entón cando as ideas de creación de sistemas de xogo e de ambientacións variadas de rol dos dous converxeron en unha: o desenvolvemento dun xogo de rol enteiramente en galego, mesturando lendas da nosa Galiza con lendas de todos os países que nalgún momento tiveron contacto coa Cultura Celta. O resultado foi As crónicas de Gáidil. Víctor Rivas (Vigo, 1965), debuxante de longa carreira profesional, é o encargado de ilustrar este mundo imaxinario, como resultado dun intenso traballo cos autores do xogo. A traxectoria de Rivas está ligada ao mundo do cómic (con colaboracións en xornais e revistas como Atlántico Diario, El País de las Tentaciones, Golfiño, BD Banda ou Míster K) e ao da ilustración, con experiencia ademais en aventuras gráficas e animación.<
