Resumen
A denominada novela simbólica foi cultivada todo ó longo do pasado século XX acaso en reacción contra a chamada realista que, dende o positivismo, impregnou non poucas das escritas baixo tales adscricións, tamén todo ó longo dese mesmo século.
Na novela simbólica, baixo unha trama que na aparencia se nos podería antollar tan só realista, entóbanse cantidade de significacións que son descrifrables en ocasións, pero que resultan dificilmente detectables noutras.
Los otros días foi, polo menos de momento, a única novela de Alfredo Conde editada unicamente en castelán, en espera de ser editada na lingua na que foi escrita, e foi tamén a súa primeira incursión no eido da novela simbólica. Nela, moitas de tales claves permanecen aínda ocultas para os máis dos seus lectores. Sen embargo, en Memoria do soldado, esta nova e segunda incursión do autor no sempre vizoso eido da novela simbólica as máis destas claves han ser desveladas de contado polo lector a pouco que permaneza atento: o seu antibelicismo, o seu antimilitarismo son tan evidentes que así se pode anunciar. Pero hai moitas máis significacións que reclaman a lectura atenta desta historia na que un octoxenario evoca, dende a altura dos seus anos, dende a súa profesión de entomólogo e dende a súa condición homosexual, a guerra civil que durante un tempo dividiu ó seu país en dous bandos non tan irreconciliables como podería parecer, o de Eol e mais o de Oldn. A esa lectura atenta e minuciosa propia dos amantes da literatura encoméndase esta nova novela que sen dúbida significa un paso adiante máis dado por quen ten acadado para as nosas letras os maiores recoñecementos que lle levan sido concedidos fóra dos seus, dos nosos, lindes naturais.
